സെപ്റ്റംബർ 6 മുതൽ 12 വരെ നടക്കുന്ന ഓണം വാരാഘോഷത്തിന്റെ ഭാഗമായ ഓണം ട്രേഡ് ഫെയറും എക്‌സിബിഷനും നാളെ വൈകുന്നേരം ഏഴിന് മന്ത്രി ആന്റണി രാജു ഉദ്ഘാടനം ചെയ്യും. ചടങ്ങില്‍ എം.എല്‍.എമാരായ കെ ആന്‍സലന്‍, വി.കെ പ്രശാന്ത്, തിരുവനന്തപുരം കോര്‍പറേഷന്‍ മേയര്‍ ആര്യാ രാജേന്ദ്രന്‍ തുടങ്ങിയവരും പങ്കെടുക്കും.

സ്പീക്കർ എം.ബി.രാജേഷിനെ മന്ത്രി സ്ഥാനത്തേക്കും എ.എൻ.ഷംസീറിനെ സ്പീക്കർ സ്ഥാനത്തേക്കും കൊണ്ടു വരാൻ സിപിഐഎം തീരുമാനം. ഇന്ന് ചേർന്ന സിപിഐഎം സംസ്ഥാന സെക്രട്ടേറിയറ്റിലാണ് തീരുമാനം. എം.വി.​ഗോവിന്ദന് പകരക്കാരനായാണ് എം.ബി.രാജേഷ് മന്ത്രിസഭയിലേക്ക് എത്തുന്നത്. ഇതോടെ എം.വി.​ഗോവിന്ദൻ മന്ത്രിസ്ഥാനം രാജിവക്കും. ഔദ്യോ​ഗിക പ്രഖ്യാപനം അൽപ്പ സമയത്തിനകം ഉണ്ടാകും.

സർവകലാശാലകളിലെ വൈസ് ചാൻസലർ നിയമനത്തിൽ ചാൻസലർ എന്ന നിലയിലുള്ള ഗവർണറുടെ അധികാരങ്ങൾക്കു കടിഞ്ഞാണിടുന്ന സർവകലാശാല നിയമ (ഭേദഗതി) ബിൽ നിയമസഭ പാസാക്കി. പ്രതിപക്ഷ ബഹിഷ്കരണത്തിനിടെയാണ് ബിൽ പാസ് ആക്കിയത്. മന്ത്രി ആർ.ബിന്ദു കൊണ്ടുവന്ന ഔദ്യോഗിക ഭേദഗതി സഭ അംഗീകരിച്ചു. വിസിമാരെ കണ്ടെത്താനുള്ള സേർച് കം സിലക്ട് കമ്മിറ്റിയിൽ ഉന്നത വിദ്യാഭ്യാസ കൗൺസിൽ വൈസ് ചെയർമാനെയാണ് ബില്ലിൽ ഉൾപ്പെടുത്തിയിരുന്നത്.