ലോകായുക്ത ഭേദഗതി ഉൾപ്പെടെയുള്ള ഓർഡിനൻസുകളിൽ ഒപ്പിടാൻ കൂട്ടാക്കാതെ സർക്കാരിനെ സമ്മർദ്ദത്തിലാക്കിയ ഗവർണറെ കടന്നാക്രമിച്ച് സിപിഎം. ഗവർണർ ആരിഫ് മുഹമ്മദ് ഖാന്റെ ഇടപെടൽ ജനാധിപത്യ വിരുദ്ധമാണെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ പറഞ്ഞു. ബോധപൂർവം ഗവർണർ കൈവിട്ട് കളിക്കുകയാണ്. ഇത് ജനാധിപത്യ പ്രക്രിയയെ ദുർബലമാക്കുമെന്ന് കോടിയേരി ആരോപിച്ചു

മലപ്പുറം വഴിക്കടവ് ചെക്പോസ്റ്റിൽ വൻ കഞ്ചാവ് വേട്ട. കാറിൽ ഒളിപ്പിച്ചു കടത്തുകയായിരുന്ന 132 കിലോ കഞ്ചാവാണ് പിടികൂടിയത്. എക്സൈസ് ഉദ്യോ​ഗസ്ഥർ വഴിക്കടവ് ചെക്പോസ്റ്റിൽ വെച്ച് 5 അംഗ സംഘത്തെയാണ് അറസ്റ്റ് ചെയ്തത്.നാടുകാണി ചുരം ഇറങ്ങി കേരളത്തിലേക്കെത്തുമ്പോഴാണ് സംഘം ചെക്ക്പോസ്റ്റിൽ പിടിയിലായത്. 2 കാറുകളിൽ ഒരു കാറിൻ്റെ ഡിങ്കിക്കുള്ളിൽ 6 കെട്ടുകളാക്കിയാണ് കഞ്ചാവ് ഒളിപ്പിച്ചിരുന്നത്.

കേരളത്തിൽ മിൽമയുടെ സംഭരണം ഗണ്യമായി കുറഞ്ഞുവെന്ന് മിൽമ ചെയർമാൻ കെ.എസ് മണി. മലബാർ മേഖലയിൽ മാത്രം പ്രതിദിനം 50,000 ലിറ്റർ കുറഞ്ഞു. മൂല്യവർധിത ഉത്പന്നങ്ങളുടെ നിർമാണവും ഇതോടെ കുറഞ്ഞു. ഓണത്തിന് മറ്റ് സംസ്ഥാനങ്ങളിൽ നിന്ന് പാൽ എത്തിക്കുമെന്നും മിൽമ ചെയർമാൻ പറഞ്ഞു. പാല്‍ എത്തിക്കാന്‍ കര്‍ണാടക മില്‍ക്ക് ഫെഡറേഷന്റെ ചെയര്‍മാനുമായി സംസാരിച്ചിരുന്നു.

സംസ്ഥാനത്തെ റോഡുകളിലെ കുഴികള്‍ സജീവ ചര്‍ച്ചയായ സാഹചര്യത്തില്‍ പ്രതികരണവുമായി കേന്ദ്ര മന്ത്രി വി മുരളീധരന്‍ രംഗത്ത്. സംസ്ഥാനത്തെ കുഴി, കേന്ദ്ര കുഴി എന്നെല്ലാം വിശേഷിപ്പിക്കുന്നത് അപഹാസ്യമാണ്. കുഴികളെ കുറിച്ച് പറയുന്നതില്‍ തനിക്ക് അപകര്‍ഷതാബോധമില്ലെന്ന് മന്ത്രി മുഹമ്മദ് റിയാസിനെ പരോക്ഷമായി പരമാര്‍ശിച്ച് അദ്ദേഹം പറഞ്ഞു. ഒരു സിനിമയുടെ പരസ്യത്തില്‍ കുഴി എന്ന് പറഞ്ഞതിനെതിരെ പോലും പ്രചരണം നടക്കുകയാണെന്നും അദ്ദേഹം പരിഹസിച്ചു.